આવી મળે- રમેશ પટેલ (આકાશદીપ)

એ કલા ને એ કલા કંઈ ના વળે

ભળે સુરમાં સંગીત તો રંગતો આવી મળે. 

 

સ્નીગ્ધ ધારા સમર્પણે વાટને સીંચ્યા કરે

પ્રગટે જ્યોત ને પુનીત અજવાળાં આવી મળે. 

 

મીઠડાં જળ, ધરાએ અંકુરને હૂંફથી પોષ્યા કરે

વનરાજીને ખોળે વીહંગોના કલરવ આવી મળે

 

સજી શણગાર સુમન જો મનભરી મ્હેંકી ઊઠે

વસંતના વહાલ આંગણે અનંગ સંગ આવી મળે

 

કીરણના સપ્ત સંદેશ આભલે જો જળ ઝીલે

ગગન શોભાવતું મેઘધનુષ ખીલતું આવી મળે

 

અમૃત હેલીએ સુધાકર સાગરને સ્નેહથી ભરે

દીશા ગજવતો  પ્રેમનો ઘુઘવાટ મોજાંમાં આવી રમે

 

અધરથી વાંસળીમાં જો વહાલના સુરો સરે

માધવને વૃન્દાવને ઘેલી રાધા દોડી આવી મળે

 

ચાર દીવાલોમાં જીંદગી પુરે કાંઈ ના વળે

મેળામાં મહાલો ‘આકાશદી’ પ તો માણીગર આવી મળે

 

– રમેશ પટેલ (આકાશદીપ)