પરીવર્તન -2

પ્રચંડ ધડાકો – બીગ બેન્ગ

આશરે 1,370 કરોડ વર્ષ પહેલાં

બીગ -બેન્ગ વિશે હ્યુસ્ટનના ઈજનેર- કળાકાર શ્રી. દિલીપ પરીખની ચિત્ર કલ્પના. — આ ચિત્ર પર ક્લિક કરી, એ ચિત્રનું રસદર્શન માણો…

    એ કોઈ ગુઢ, ન સમજી શકાય તેવી સ્થીતી હતી. સમગ્ર બ્રહ્માંડ એક જ બીંદુ ઉપર કેન્દ્રીત થયેલું હતું. તેમાં દ્રવ્ય ખીચોખીચ ભરેલું હતું. આંકડા વડે દર્શાવી ન શકાય એટલું પ્રચંડ તેનું વજન હતું. કોઈ પણ પદાર્થ ખમી ન શકે એટલું તેનું ઉષ્ણતામાન હતું. અને એ બીંદુની બહાર કેવળ શુન્યાવકાશ હતું – એટલે કે ત્યાં કશું જ ન હતું. તેનું ઉષ્ણતામાન શુન્ય અંશ કેલ્વીન હતું – જેનાથી વધારે ઓછું તાપમાન શક્ય જ ન હોય તેટલું. અને આ બન્ને, સાવ વીભીન્ન હોવાપણાંને અલગ રાખતું એક અદ્રશ્ય, અને જડ આવરણ પણ હતું જ.

     અથવા આનાથી સાવ વીપરીત કાંઈક હતું. એટલે કે સમસ્ત જગત પ્રચંડ વજનના, ઠંડાગાર દ્રવ્યથી ભરેલું હતું અને તેના કેન્દ્રમાં કેવળ ધગધગતું શુન્ય હતું – કોઈ કદ વીનાનું, ઉષ્ણાતીઉષ્ણ, બળબળતું અને ધગધગતું, અનસ્તીત્વ.

     એ આમ હતું કે તેમ હતું; હોવાપણું હતું કે ન હોવાપણું; તેની ચકાસણી કરી શકે તેવું કોઈ પણ હાજર ન હતું.

     પણ આવું કશુંક, અનાદી કાળથી, બ્રહ્માંડના ગર્ભમાં લપાઈને, સુતેલું, પડેલું હતું. ત્યાં કે ક્યાંય, તે સમયે કે તે પહેલાંના સમયે કશું બનતું ન હતું. ત્યાં હોવાપણું કે બનવાપણું પણ ન હતું. કોઈ પરીવર્તન વીનાની એ કેવળ જડતા હતી.

    અને ત્યાં કશુંક થયું.

    શું થયું? શા માટે થયું? કોણે કર્યું? ક્યારે કર્યું? કઈ રીતે કર્યું? આવા કોઈ પ્રશ્નોના કોઈ ઉત્તર આપી શકે તેવું પણ કોઈ ન હતું.

    પણ કશુંક થયું તો ખરું જ.

    અને ક્ષણાર્ધમાં એ સમગ્ર હોવાપણું, કે ન હોવાપણું પરીવર્તનના ન થંભી શકે તેવા ચકરાવે ચઢી ગયું. કોઈ અજ્ઞાત તત્વની પ્રચ્છન્ન અભીપ્સાના બળે આમ થયું. અને જ્યાં કશું જ ન હતું એમાંથી સતત, પ્રચંડ માત્રામાં, બળબળતા દ્રવ્ય રાશીઓ ફેંકાવા માંડ્યા. હવે એ જડ હોવાપણું અપરીવર્તનશીલ સ્થીતીને ક્ષણાર્ધ માટે પણ ટકાવી શકે તેમ ન હતું.

    પ્રત્યેક ક્ષણે, પ્રચંડકાય, બળબળતા વાયુની બનેલી, નીહારીકાઓ, ચકરાવા ખાતી ખાતી, તીવ્ર વેગે, એ બીંદુમાંથી બહાર ફેંકાઈ રહી હતી અને દુર ને દુર સરતી જતી હતી. હવે તેમને એકમેક સાથે આકર્ષાતી રાખનાર, ગુરુત્વાકર્ષણ બળ પણ જન્મ લઈ ચુક્યું હતું. આ ભેગા રાખનાર બળને અતીક્રમીને એમની પ્રચંડ ગતીને કાયમી કરતું – હર ક્ષણ એ બહીર્મુખ ગતીને વધારતું – કોઈ અજ્ઞાત બળ પણ સર્જાઈ ચુક્યું હતું.

સોમ્બેરો નીહારીકા

     સોમ્બેરો નીહારીકા . પૃથ્વીથી 2.8  કરોડ પ્રકાશવર્ષ દુર, વ્યાસ – 50,000 પ્રકાશ વર્ષ , તારાઓની સંખ્યા આશરે 80,000 કરોડ !!! [  હબલ દુરબીન વડે લેવાયેલ ફોટો.  ] 

    અસ્તીત્વ વાળા બ્રહ્માંડનો જન્મ થઈ ચુક્યો હતો.

    પતીવર્તનની ન રોકી શકાય તેવી ઘટના આકાર લઈ ચુકી હતી.

————————–

આ મારી પોતાની, મારા અત્યંત સીમીત જ્ઞાનના આધાર પર રચાયેલી કેવળ પરીકલ્પના છે.

વૈજ્ઞાનીક, આધારભુત માહીતી માટે અહીં ‘ક્લીક’  કરો